Xaricdəki tələbələrin yerli universitetlərə köçürülməsinə əngəllər yaradılır? – RƏSMİ

Xaricdə təhsil alan tələbələrin Azərbaycana köçürülməsi ilə bağlı iddialar: Süni əngəllər yaradılır?

Son günlər sosial şəbəkələrdə xaricdə, xüsusilə Türkiyədə təhsil alan tələbələrin Azərbaycan universitetlərinə köçürülməsində süni əngəllərlə üzləşdiklərinə dair iddialar yayılıb.

Tələbələrin narazılığı nədir?

Tələbələrin iddiasına görə, köçürülmə zamanı onlara müxtəlif bəhanələrlə imtina cavabları verilir. Ən çox qarşılaşılan səbəblər bunlardır:

  • Kredit çatışmazlığı: Bəzi hallarda tələbələrin keçdiyi dərs kreditlərinin sayının yetərli olmadığı bildirilir.

  • YÖS imtahanı ilə bağlı tələblər: Tələbələr qeyd edir ki, 2023-cü ildə Türkiyə dövlət universitetlərinin keçirdiyi YÖS imtahanı ilə qəbul olublar. Lakin onlara yalnız TR-YÖS nəticələrinin keçərli olduğu bildirilir.

  • Rüsum ödənməsinə baxmayaraq imtina: Bəzi tələbələr Təhsildə Keyfiyyət Təminatı Agentliyinə 250 manat rüsum ödədiklərini və köçürülmə üçün şəhadətnamə aldıqlarını qeyd edirlər. Buna baxmayaraq, müraciətləri qəbul edilmir.

Rəsmi açıqlama: Köçürülməyə hansı hallarda icazə verilir?

Məsələ ilə bağlı Elm və Ali Təhsil üzrə Dövlət Agentliyi rəsmi açıqlama yayıb. Bildirilib ki:

  • Qaydalara əsasən, tələbə təhsil aldığı müddətdə müvafiq proqram üzrə minimum 50% kredit toplamalıdır.

  • Ali təhsildə normativ təhsil müddəti 4 il olaraq müəyyən edilib. Hər tədris ili üçün 60, hər semestr üçün isə 30 kredit norması mövcuddur.

  • Minimal dərs yükü ilə təhsil alan tələbələrin uzunmüddətli təhsil planları normativə uyğun sayılmır.

YÖS imtahanı ilə bağlı tələblər nədir?

Agentliyin açıqlamasına görə:

  • Türkiyədə 2023-cü ildən etibarən yalnız mərkəzləşdirilmiş TR-YÖS imtahanı nəticələri qəbul olunur.

  • Universitetlərin keçirdiyi lokal YÖS imtahanlarının nəticələri etibarsız sayılır.

  • Bu qayda həm 2024-cü il, həm də 2025-ci il üçün qüvvədədir.

Kimlər imtahandan azaddır?

Yalnız bir halda tələbənin mərkəzləşdirilmiş imtahansız köçürülməsi mümkündür:

  • Əgər tələbənin oxuduğu universitet dünya reytinq cədvəlində ilk 500-lükdə yer alırsa.

Köçürülmə qərarını kim verir?

Agentlik əlavə edib ki, köçürülmə qərarları ali təhsil müəssisələri tərəfindən verilir, Agentlik isə yalnız prosesi nəzarətdə saxlayır.

Tələbələr köçürülmə ilə bağlı çətinlik yaşadıqları halda birbaşa köçürülmək istədikləri universitetə müraciət etməlidirlər.